Մեր վարժարաններու աշակերտութիւնը գրեթէ ամէն տարի կ'այցելէ Ճիպէյլի «Թռչնոց Բոյն»ը, ծանօթանալու անոր ներքին կառոյցներուն, ուսման ընթացքին, զբաղումներուն և ընդհանրապէս առօրեային:
Այս տարի եւս, 6 Մայիս 2022ին, ուսուցչուհիներ՝ Արմիկ Եաղլեանի, Մանիշակ Ալեքսանեանի, Թալին Մելիքեանի և Լէյլա Ֆարհաթի առաջնորդութեամբ, 6-9րդ դասարաններու աշակերտութիւնը ուղղուեցաւ «Արամ Պէզիքեան» Թանգարան եւ «Թռչնոց Բոյն», տեղւոյն վրայ ծանօթանալու այս կարեւոր կրթական-բարեսիրական-մարդասիրական հաստատութեան առաքելութեան:
Յիշեցնենք, որ այս որբախնամ և որբահաւաք դպրոցը ծնունդ առած է Մեծ Եղեռնին որպէս արդիւնք, երբ բազմահազար երեխաներ մնացած էին անտէր-անտիրական, իսկ անոնց հաւաքին ու պատսպարութեան նախաձեռնութիւնը կը պատկանի շուէտացի Մէյրի Ճիքիպսընի, որ առանձինն յանձն առաւ այդ երեխաները համախմբելու, դառնալով անոնց հոգեհարազատ «մայր»ը և խնամակալը, ապաստան, ուսում, կրթութիւն ու տիրութիւն ապահովելով անոնց:
Պատասխանատուները սիրով ընդունեցին աշակերտները, որմէ ետք՝ առաջին հերթին, մուտք գործեցին թանգարանը, ուր կար հարուստ գրադարան մը, հայերէն և օտար լեզուներով, պատմական վաւերաթուղթեր, փաստաթուղթեր, վկայութիւններ, լուսանկարներ, արձանիկներ, որոնք առընչութիւն ունէին Հայոց Ցեղասպանութեան և անոր հետեւանքներէն առաջացած գիտելիքներուն:
Յատկանշական ու բաւականին յուզիչ էր մազապուրծ փրկուած որբերու հաւաքական նկարը, մանաւանդ անոնց կենդանի ձայներով, ինչ որ աւելի կը շեշտէր սպանդին դառնութիւնները և անոնց ձգած ազդեցութիւնները այդ անմեղ մանուկներուն վրայ:
Նահատակուած գրողներու ու մտաւորականներու լուսանկարները եւս տպաւորիչ էին:
Այնուհետեւ աշակերտութիւնը շրջեցաւ դպրոցի զանազան մասերը, դասարանները, ճաշարան, սրահ, խաղավայր, նոյնիսկ՝ խոհանոց, որոնք բոլորն ալ արդիական էին ու լաւ կահաւորուած, հանգստաւէտ պայմաններով:
Յիշատակելի էր աշակերտութեան գոհունակութիւնը, իր ստացած տպաւորութիւններով և յուշագրութիւններով, որոնց համար շնորհակալութիւն յայտնուեցաւ ընկերակցող ուսուցչուհիներուն: