Չորեքշաբթի, 29 Սեպտեմբեր 2021ին, աշնանային գեղեցիկ օրուան մը կը զուգադիպէր ՀԲԸՄի Վարժարաններու Մանկապարտէզի վերամուտը:
Նոր աշակերտներու համար դժուար էր բաժնուիլ իրենց ծնողներէն, սակայն ուսուցչուհիներու ժպիտն ու գուրգուրոտ մօտեցումը համոզիչ էին և օգնեցին որ փոքրիկները շուտով շաղուին նոր միջավայրին հետ:
Առաջին զանգին յաջորդեց առաջին աղօթքը, որմէ ետք Մանկապարտիզպանուհի Օրդ. Սոնիա Տեյիրմենճեան բարի գալուստի խօսքերով ողջունեց երեխաները ու բարի վերամուտ մաղթեց բոլորին:
Փոքրիկները, դաստիարակներու առաջնորդութեամբ ուղղուեցան գեղեցկօրէն զարդարուած իրենց դասարանները, ուր հերթաբար ծանօթացան ուսուցչուհիներուն և անոնց դասաւանդած նիւթերուն, ինչպէս նաեւ խաղացին մանկական խաղալիքներով օժտուած սիրուն խաղավայրին մէջ:
Ժամերը արագ սահեցան ու կէսօրին, մեր ժրաջան սաները վերամուտը խորհրդանշող ձեռային աշխատանքները հպարտօրէն բռնած՝ ուրախ տրամադրութեամբ տուն մեկնեցան:
Երկուշաբթի, 4 Հոկտեմբեր 2021ին, Մանկապարտէզի Ծիլ դասարանը վերաբացաւ իր դռները և ճաշակով յարդարուած տաքուկ յարկին տակ ընդունեց սիրասուն մանուկները: